اِیشوَر ری ہووے بݙائی!
مھے تھاں خاراں نا ایئے مارواڑی ٻولی ری ویب سائٹ تے بھَلاں آیا، جی آیا کہیں۔ اے پاکستان رے بھاٹیپے لہجے میں ہے۔ ایئے ویب سائٹ تے تھے اِیشوَر رو وچن، دھرمی ویڈیو، بھگتی را بھجن، بھگتی رے باتاں، ویڈیو اَن آڈیو اپݨی میٹھی ٻولی میں جو اَن خُݨ خَگئی۔ اِیئے خاں تھاں نا ٹھاء لاگخے کہ اِیشوَر تھاں خاں کِترو پریم کرئی۔
مارواڑی ٻولی جکو پاکستان میں (پنجاب اَن سندھ) اَن ݙیخ میں (راجستھان اَن مدھیا پردیس) میں ٻولی جاوئی۔ اے ٻولی ٻولݨ آݪا نیپال رے ملک میں وی ہے وا۔ مارواڑی ٻولݨ آݪاں ری گنتی کوئی 16000000ہے، اِیئاں اے ٻولی پاکستان اَن ݙیخ میں خارا خاں گھݨی ٻولی جاوئی۔ پاکستان میں ایئے نا ٻوݪݨ آݪا کوئی 3000000 جِݨا اَن ݙیخ میں کوئی 13000000 جِݨا ہے۔ مارواڑی ٻولی میں علاقے رے فرق ری وجہ خاں کئی لہجا ہے۔
پاکستان میں اِیئے نا فارسی اَن عربی رسم الخط لِکھیو جاوئی، جاں اردو اَن سندھی لِکھیجئی، پݨ ݙیخ میں ایئے نا دیوناگری رسم الخط میں لِکھیو جاوئی، جاں ہندی لِکھیجئی۔ کیتھ وی آج تک مارواڑی ٻولی نا لکھائی پڑھائی رے خارُو جاں سرکاری طور تے کوئی اہمیت کونی ݙنی گی۔ پاکستان میں مارواڑی را تین موٹا لہجہ ہے۔ اُوگاݨ، بھاٹیپو اَن گھݙاݪ۔ ہو خگئی کہ پاکستان اَن ہندوستان ری مارواڑی بالکل ہیک جیہڑی نی ہووے پݨ ہیکے ٻِجے خاں گھݨی بِچرئی اِیئے خارُو ٻِنہے ٻولے ہیک ہے۔
